الوداع

چیین لریمده اؤلوم یول گئدیر.

توت اللریندن.

و بایاغی دوشمه سین دئیه

                         پوز عزراییلین

                                 سیرا آددیملارینی.

سنه اینانیرام سا

دئمه لی قتلیمه دورموش بیریسی.

دئمه لی بابام الینده بیاض چلینگ

                                     گؤزله ییر منی.

توت اللریندن.

توت دا خویوم دییشسین،

              و سئویم سنی

چارام یوخ گؤزل

باییر «سسیسن سیزلیک»^۱ دیر.

و من اینانمیرام هله ده چیین لریمین یونگوللویونه.

 

 

۱- ترکیب دودو دوستی دن دیر

 

بیر دوستون ترجومه سی

 

مرگ روی شانه هایم راه می رود.

دستانش را بگیر .

و چون زیاد مصنوعی به نظر نیاید

                        قدم های منظم عزراییل را به هم بریز.

اگر ترا باور دارم ،

پس کسی  کمر به قتل من بسته

پس پدر بزرگم

        منتظرم ایستاده

                  با عصایی سفید در دستانش.

دستانش را بگیر.

بگیر تا عادت همیشه ام عوض شود،

              و دوستت داشته باشم .

چاره ای نیست زیبای من.

بیرون پر از بی صدایی توست.

و من هنوز سبکی شانه هایم را باور ندارم.  

 

رضا احسانی یه

دون دوشوندوم

یاغیشلی بیر صاباح اولایدی کاش

و سن ایسلاق آغاجلاری

آردینا بوراخایدین

اوزون قوپ قور ایکن

گله یدین،

اللرینده نه ساز نه ده توتک سسی

یاریم ایچیلمیش ویسکی

و یایلیفینی توتارکن آرخاندا سورویوردون.

دوداغلاریندا ،

فیت ایسته میرم

یاریم جان قالمیش گسمه شیکسنه بس ائدری منه

بادا

یادا گلمیردین

نه بارداغیم دولاییدی ویسکی دن

نه قولاق لاریمدان باشلایارکن

                            جانیم تیترردی شیکست کسمه لریندن

دون دوشوندوم عزیزیم

هئچ اولماسایدین کئشکه...

 

چوره ک

چؤرك كيمي ايدين.

دوز كيمي.

آدينا آند وئرمك اولاردي.

سن «بالديران آجي» سي دئييل دين.

قارا چوخام ايدين

بير عؤمرون ياريم باهارليغيندا.

باشين،

اوزون زمي لرين كولك دن سونرا پريشانليغينا اوخشار.

آياغين تورپاغدا ايكن سئويشمه حسرتينه بويلو.

خيش ششششش،خيششششش.

بدنينده كولك گزيشير

اووووف اووووف ديليني كيمسه باشا دوشمور،

تانري بئله.

بركتلي ايدي آدين

بلور بدنين كيمي.

سنين دوداقلاريني كيم اؤپمزدي؟

يازين قيرخ بئشينده.

باشسيز گؤوده نه بيچاق چكنده گونش

كيم سنه سجده يه گلمزدي؟

كربلا مصيبتي دير دئيه.

اينسان دئديين

بير اينسان دي

بيرده سنين غمين.

غم

مين ـه مين

            گلير سوفره ميزه.

آي باشيني باغلاديغيم يايليقلي قيز!

نه واختاجان اسمرلييينه غئيرتيم گؤينه سين؟‌

نه واختاجان سنه بوغدا كيمي بركت دئييم

چؤره ك كيمي آند وئريم

دينيم ده دينمه ييم ده

اؤزگه اوراغي گزيشسين گؤودن ده

آدين چؤرك كيمي ايدي

آند ايچمك اولاردي

پيغمبر اوولادي كيمي.

بير اسيم بيزيم زميليكده گزيشسه نم

بير اووج بيزيم تنديرده اود اولسانام

ائويم آجليق خوراسيندا جان وئرير

توم اولسانام

منيم تورپاغيما دوشسنم...

 --------------------------------------------------

سيامك (علي) صبري اينتحار ائتدي.

يارپاقلي گونلردن ياديمدادير. ائيواز اونو بيزه تانيتديردي. سيامك ين آرا سيرا يازيلاري دا يارپاق دا گئديردي. هئچ اؤلومه اوخشاميردي يازلاري آنجاق يامان عذابلي سيماسي وار ايدي سؤزجوك لرينين. اوزامان من تزه تزه نثر اوخويوب يازماغي مشق ائديرديم او مضمونجا راحات ديل جه چتين يازارايدي. اؤلومو ده چتين اولوب ائشيتدييمه گؤره. واختيلا هانسي سا بير دوست دان ائشتميشديم كي بيز ياشاديغيميز كيمي اؤلمه لييك. بئله ايسه اؤلوم بيزده يامان دهشتلي اولمالي دير. بيلميرم نييه اينتحار ائديب. بيلميرم ده هانسي واسيطه ايله. آنجاق بيليرم كي اؤز جانينا قصد ائتمك چتين ايش دير هم ده دهشتلي. بيرده گؤره سن حياتدان اوزولمك بو قده ر راحات دير؟؟؟ بلكه حياتي كيمي. آخي ايسئوئچ حياتيندان اوخودوغوم دهشتلي و ظولمكار حياتي هله ياديمدادير.

آللاه سيزين جانيزا ديمه سين.

باشين ساغ اولسون وطن

 

گلمه

سويوتومور ايچيمي پاپريز.

اوزون ايللر اولدو گونش سيز ليييم ده له لك سالديغيم.

بودور گؤينه يير اومودلاريم.

آرا بير آرا، آي خانيم قيز!!!

 

او شيمشاد اوغولدان

                 بوغو ساريمتيل

                               قارتيميش بيركيشي قاليب تكجه.

اوندا كي يوخ ايديم دا يئتيم ليييمه تيكه توتدو شعيرلريم.

اوندا كي وارا گلديم ده

            خوروز بانيندان

            ايت بانينا قده ر اللريم قابار باغلادي.

فهله اللريم،

و ده سئوه ن اللريمي دئييرم آي خانيم قيز !!!

 

ياديندان چيخدي اؤلوم اؤيره ده سن منه.

ياديندان چيخدي دئيه سن نه واختسا

                                     هارداسا بورنومون اوجوندان بئله چيخاجاق جانيم.

آخ خ خ خ!!!

سئويشمه يورغونودور ياتاق يئريم.

يادينداديرمي

             مين اؤپوشلوك ياناق يئريم؟

يادينداديرمي بير ديش ليك دوداق لاريم؟

يارپيز قوخوسونا بله نن جانيم؟

كئي اللريم يادينداديرمي؟

ايكي يانيما دوشن زامان.

سونرا،

هر شئي سونراسي پيچيلتي لارين؟

من بونلاردان اؤله جك ميشم بونو بيليردين مي؟

ايندي اوزون ايللر سونراسيندا

بوغو ساريمتيل اوز گؤزوم قاليب يئرده.

و بيرده ايچيمين گؤينلتي سي.

 

بونلاري بوراخ.

ايندي گلمه آرتيق.

گلمه ده لئش قوخوسونا دؤنموش اللريم قالسين آراليق دا.

و آني لار خاطيرلانسين يوخلوغوندا.

سن واركن

هر شئي اونودولور آخي.

قاييتما دا،

كولك باجين اولسون .

ياغيش قارداشين.

مني دينديرمه يه ديلين اولماسين...

شهید

گئت آللاه آماناتی...

دوداق ده یمز دئییل دی بو سؤزجوک لر.

پارالانمیش آلما یاری سی ایدی.

و گئدیش باهاناسینا

                  پامبیق یوللارین بیر کاسا سو بورجو ایدی

                                                           اؤده نیش کانداریندا.

و گئتدی...

گئتدی ده یاریدا آچیلی قویدو آتوشگه نی.

دؤن

دؤنوش خبرینه بویلو ایکی تاغلی کانداری.

او گون یوباندی توتک سسی،

دانلاق کیمی لیینده سوسدو عؤمورلوک.

اینسان ایتیرده دومان دا ،

اینسان باتیردا جیزگی لرینده،

آنجاق پالید کیمی اولور گؤز،

                    قاپی لارین هر دؤنه آچیلیب باغلانماسیندا

بیرده

     بیرده بارماقلاری دونور تسبئح ده آتا بیر کیشی نین

نه واخت

         نه واخت

                 نه واخت گله جک دئیه اسنه مه سینده

و آنا قادین ساچلارینی هؤروکله ییر هرگون

بیر الچیم خینا باهاسینا

نه واخت

نه واخت

.

.

.

آللاها آمانات ایدی دا گلمه دی

و بیرداها کیمسه ائشیتمه دی توتک سسینی...

و ائوین کانداری تاختالاندی.

تاخ!

 قاپاندی.

ساری کؤینک

گتیر ساری کؤینه ییمی.

چیخارداق اینیمیزی.

و پاییزیلیق اولسون دئییه،

                      سوواراق ساریلیق دردینه ایچیمیزی.

من کی پریشان یاری آت یاری آدام دئییلم.

من پریشان اوغلان اوشاغییام.

                         اومسوق ....

آردی

بلكه ده بير قادين سيزاجاق دي؛

                                    بو مصراع دان سونراني دئييرم.

و  اونون عطيرلري اوستو باشي اولاجاق دي.

يئنه بوندان سونراني دئييرم.

 منده ايزي گؤرونه جك دي

بلكه ده بير آزدان نه سه بير شئي،

شئي يوخسا دا،

                 بير سؤزجوك اولاجاق دي بو شعرده.

سونراسي قيامت اولابيلر...

آردی

قیرمیزی

او سولچو دئییل دی.

قیرمیزی نی سئویردیسه.

او اصلینده سئومه یی باجاریردی تکجه.

و ده فیرچاسیندا بویلو اولدوغو جیزیق لاری.

قیرمیزی جیزیق لاری دئییرم.

 

باهار اونون ائوینده چیچکلی دئییل دی.

قارا قامچیل قیز بدن ایدی

               دلی جه سینه اؤپوش سونراسی.

و باشیندا اکیلمیشدی پاییز

                         همشه باهار کیمی.

او ساغ چی دا دئییل دی.

لاپ دوزونه دورساق،

              او ساغ دئییل دی هئچ

هر گون یازی ماساسیندا اوتوروب،

چایی سویوقدان سونرا ایچردی.

سو دادلی ایدی رسیم لری

آنجاق هر شئی اودلو ایدی اوندا.

لاپ او قیرمیزی جیزیق لاردا.

-          خانیم نه دیر سیزده بو قیرمیزی ائحتیراص؟

-          هاوالارین سویوخ کئچمه سی دیر بلکه.

                                    بلکه ده رسم اثرلریمده بیر کیشی نین یوخلوغوندان ایرلی گلیر.

گلیر!  

     گلیر دئییه دوشونوردو او

کؤهنه و باریتلی بیر گلیش یوخ

تزه

اردبیلین تزه مئیدانیندان گلن بیر هارایی دئییردی بلکه!؟

-          آی بولغاواردیر گیلاس

           آی بوردا واردی گیلاس

گی

   گی

        لاس لی قیز.

 

- عؤمرومون هاراسیندان باشلاندین آخی سن؟

ائله کی یوخویا قالدیم

و اولدوزلاریم  اؤزوم بیلمه دن سانجاقلاندی اته یینه.

 گؤزو قانلی اولدوزلاریمی دئییرم،

                          ائشیدیرسن می؟

سونرا بیزده توی اولاجاق دی

و دوستلاریم توتوملو شراب سوزه جک دیلر قارشیمیزدا

شعرلی و رسیم لی حیات ساغلیغینا،

وور ها وور دوشه جک دی رقص قوللاریندا

تره کمه، هئیوا گولو چالیناجاق دی تپیک لرده.

آی خیاو شاعیرینین لولو قنبر گؤزوندن ایراق.

سئویرمیسن بو حالی؟

بیرده موغانلی شاعیرلرین شعریندن اوزاق.

اوزاق گزمه لی دئییل دین آخی سن!!

سنی هانسی یؤنده ایتیردیم ائی اللری گیلاسلی قیرمیزی قیز؟

تویوموزدا شاباشینی گؤزله ییرم،

یوخودا گلسن بئله.

گبیب ده اردبیلین تزه مئیدانیندا های سالیب اوخوسان بئله.

آی آلمادی هئیوادی

آی آلمادان قالمادی

قیرمیزی گیلاس واریم

آی سبدده قالمادی.