بالتا

 

حمید آصفی

 

ایندی داها هئچ دخلی یوخدور؛

یاغیش یاغمیردا یاغماسین.

اونسوزدا ائویمین ایچینه هوپموش

                          بو خالچا چیچکلری

                                       توز توزاناقدان سولاجاق.

۝

 توزلو بالتان قدر

              رحمه قالیر بو شهر.

اوتوز ایل کؤهنه یه گئدیر ایچیمیز.

بابام دیسکینیر نامازیندا

دوشور دوداغینی اوچوق یئریندن

                - «و بالتالاری الینیزده ساخلایین

                           توکنمه ییب بو ساواش...»*

ایندی داها

              دخلی یوخدور

                       سن بو توزاناقدا آغاج

                               یوخسا آغاج کولگه سی نی بالتالا.

 

 

 

*قرآن کریم دن بیر آیه

 

آد

 

حمید آصفی

.

.

.

ریانت

تنایر

آنتری

نتاری

یانتر

یتنار

نراتی

رنتای

تارنی

.

.

.

گؤر نه قدر زیبیل سؤزجوک لر

                                   دوزلتمک اولور

                                          گؤرونمز کیشی نین آدیلا .